الإشاعة قتلات الممثل عبد القادر مطاع.. فرد من عائلتو ل”كود: السيد صحة سلام فدارو

خلال الساعات الأخيرة لي دازت كان الخبر لي شاغل المغاربة في مواقع التواصل الاجتماعي، هو واش خبر وفاة الممثل عبد القادر مطاع صحيح ولا اشاعة.
بزاف ديال الفنانين نشرو التعازي وعبرو عن حزنهم لوفاتو بعد المرض وبعد فقدان البصر. ولكن فنانين اخرين كتبو في تدوينات أن مطاع حي يرزق وهادشي غير إشاعة.
واحد من افراد عائلة مطاع، قال ل “كود” أن الخبر كذوب والسيد صحة سلام فدارو مخاصو حتى خير. وحتى هو تفاجأ وتخلع بعدما بداو يعيطو الناس في رقمو باش يتأكدو من الاشاعة. وأضاف ذات المصدر أن هاد الخبر برزرط عائلة الفنان.
وانتشر الخبر بزاف في الانترنت، ولحد هاد صباح باقي كل واحد يلغي بلغاه.