الجامعة حنات الراس لوجادة وبراكنة.. برمجات الماتش ديال ليبيا فوجدة والمنتخب المحلي والجزائر غادي يتلعب فبركان

الجامعة الملكية المغربية لكرة القدم حنات الراس لوجادة وبراكنة، بعدما قررت برمجة جوج ديال الماتشات ديال المنتخب الأول والمحلي بالجهة الشرقيةظ
فوزي لقجع، رئيس الجامعة استجب لطلبات جمهور المنطقة الشرقية، لي عبروا عن الرغبة ديالهم باش يحتضنوا حتا هوما مباريات المنتخب الوطني، بعد الحملة لي دارها في الفايسبوك.
الجامعة قررت أن تجرى مباراة المنتخب الوطني الأول وليبيا فملعب الشرفي فوجدة نهار 11 أكتوبر المقبل، في الوقت الذي غادي يتلعب الماتش ديال المنتخب المحلي والجزائر بالملعب البلدي فبركان نهار 18 أكتوبر جاي.
علاش اختارت الجامعة المنطقة الشرقية، اولا باش ترضي سكان المنطقة الشرقية، وتضمن حضورهم بكثافة من مختلف المدن القريبة، خاصة من السعيدية وزايو والناظور واحفير وتاوريرت وكرسيف والدريوش، وثانيا أن لا الملعب الشرفي بوجدة، ولا الملعب البلدي ببركان كيتوفروا على أرضية مزيانة بزاف غادي تساعد اللعابة باش يقدموا مستوى جيد.