مقرب من مولاي هشام ل”كود”: الامير حيح فمطار الرباط على “اير فرانس” على تأخر باگاجو واخا بريوريتي ومسؤول من الشركة قال ليه: راه جهات مغربية هي المسؤولة

مولاي هشام ولد عم الملك محمد السادس اللي رسميا مازال امير واخا طلب يحيدو ليه اللقب وهو عارف باللي هاد الشي ماشي ممكن٬ نوضها البارح فمطار الرباط سلا. “ماگريب انتيليجانس” كشف باللي هشام ما عجبوش الحال تأخر الباگاج ديالو فرحلة من باريس للرباط. واضاف الموقع انو حرگ على موظفين وحيح عليهم وباللي هاد الامير للي كيعطي الدروس دار سبيكطاكل فالمطار وما قدرش يصبر بحالو بحال باقي المواطنين.
مصدر مقرب من الامير قال ل”كود” ان الامير دخل بشكل عادي البارح وداز بحالو بحال اي مسافر٬ وانو تسنى باگاجو اللي تعطل واخا هو مخلص عليه باش يوصل بالزربة لانو “بريوريتي”. المصدر قال ل”كود” ان الباليزة ديالو تعطلات لمدة طويلة وهنا فاش حيح.
المصدر اكد ل”كود” انه احتج على موظفي “اي فرانس” وان مسؤول فهاد الشركة خبرو باللي التأخير ماشي مسؤولية الشركة بل مسؤولية جهات مغربية. يعني قالو ليه باللي الباكاج ديالك تفتش من شي جهة.
اللي معروف ان التفتيش ما كيكونش الا بعد تسلم الحقائب والدولة عندها الحق من خلال الجمارك او الامن تقلب اي باليزة بغات.
هشام العلوي كان جاي من سراييفو بعد مشاركته فانشطة اكاديمية. جاي يعيد فالمغرب.