ورقة حمرا لعادل العوماري الصحافي الميزوجين لي هان المراة ونقص منها. الهاكا وصلوها الاتصالات والامايلات بحال الشتا

عادل العوماري الصحافي الرياضي ديال إذاعة راديو مارس جاب الربحة من بعد ما نقص من مستمعة بغات تشجع المغرب ودوا معاها بطريقة ديال قلة التربية ومتخلفة وميزوجينية، وقال ليها سيري طيبي وقابلي شميشة.
مصدر “كود” قال أن الغضب ماكانش غير في التدوينات وفايسبوك والعالم الافتراضي عموما، ولكن ولأول مرة كان تفاعل كبير جدا مع القضية، والهاكا وصلوها المئات ديال الرسائل من المواطنين لي شكاو به. وحتى الرقم الخاص بالشكايات نزلو عليه المكالمات بحال الشتا.
واكد مصدر “كود” أن الاتصالات لي عيطو البارح على ود القضية بلغو رقم قياسي.
شعب 2019 عاق وفاق، ومبقاش كيقبل على واحد يفترض فيه يكون واعي وقاري يعطي صورة ديال العصر الحجري. المرا بحالها بحال الراجل، خدامة ومستقلة وكتخلص ضرائبها، وكتستحق نفس الحقوق ونفس الاحترام.
وعلنات الاذاعة أنها وقفات العماري 3 ايام، ودابا كلشي كيتسنى القرار ديال الهاكا.