وزرا ما كيعرفهمش حتى شي امنيين. ها اللي وقع لهاد الوزيرين البارح وزيري الصحة والوزير المنتدب في الداخلية

شفتو الشوهة فين وصلات بهاد الحكومة. حتى شي بوليس ما بقاش عارف وزراء هاد الحكومة. المواطن العادي بلا ما نهدرو. البارح فاختتام مؤتمر المدن الافريقية الثامن فمراكش اللي حضرات ليه الاميرة مريم بغى يدخل وزير الصحة انس الدكالي حبسو بوليسي ما عرفتوش.
هاد الشي ما وقعش غير لهاد لوزير كيف عاينت “كود”٬ حتى نور الدين بوطيب الوزير المنتدب في الداخلية وقع ليه نفس المشكل. ما خلاوهش يدخل. وكيف عاينت “كود” جا واحد من ديوان الجهة وگال للبوليسي “ما عرفتيش السي بوطيب” رد عليه البوليسي وهاديك الساعة “كندير خدمتي” فجاوبو “حتى انا كندير خدمتي” وعرفو بشكون ودخل.
المشكلة هنا مزدوجة. اولا هاد المسؤول الحكومي خاصو يكون معاه ناس الديوان٬ ثانيا علاش ما يصايبوش ليه البادج ياك الداخلية هي اللي مكلفة بهاد الشي ديال التنظيم؟
المهم حكومة بنعرفة ما كيعرف اعضاءها حد