قودها فسيدي ايفني وكافئوه بتاونات. مشى وتابعاه اتهامات كثيرة وديما عندها علاقة بفراش دارو فاكادير

هاد عامل تاونات الجديد صالح داحا اللي نصبو اليوم الوزير المنتدب باصلاح الادارة والوظيفة العمومية محمد بن عبد القادر عندو الزهر بزاف. قودها بزاف طيلة اشرافو على سيدي ايفني من 2014 الى تعيينه. اتهمته احزاب سياسية بلعب دور سياسي ودعم مرشحين ضد اخرين. اتهمته جمعيات محلية باستغلال انشطة بالمدينة عبر منح تنظيمها لصحابو.
هاد السيد عندو شهرة كبيرة عندها علاقة بفراش دارو. كان فرش فالمرة الاولى بثمن كبير دار الخدمة فسيدي ايفني وناض الصداع على هاداك الثمن. دابا كيقولو فرش دارو الخاصة فاكادير بثمن كبير. باي فلوس فسيدي ايفني كاينة روايات كثيرة وهاد الشي الداخلية وغيرها فراسهم هاد الشي.
ما خرج بيان ينفي او يشرح او يفسر او يكذب. لا هو لا الداخلية.
تعيينو فمدينة بحال تاونات حشومة. وزير الداخلية فتنصيبو للولاة قال باللي اعتمدو على الكفاءة. قول لينا يا السي الفاهيم اش من كفاءة عند هاد خينا. وديرو معاه غير تحقيق ايلى مظلوم دافعو عليه ولا داير تابعوه بعد ما طيروه