سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
تنفرد بنشرها “كود”: سلسلة “كيفاش السلاطين ديال المغرب كايشوفو “ريوسهوم” وكايشوفو السلطة ديالهوم وكايحميوها؟ !” بروز المؤسسة الملكية كفاعل سياسي مهيمن…الرمزية السياسية للسلطان كخليفة للمسلمين(1) ح 106
الكتابات المتداولة حول دور المؤسسة الملكية في التصدي للحماية الفرنسية كتأكد ضمنيا على أن هاذ الدور كان أساسي انطلاقا من جوج ديال العوامل: عامل الرمزية السياسية للي كايتمتتع بيها السلطان المغربي بوصفو “خليفة المسلمين وأمير للمؤمنين”، وعامل سياسي صرف كايتجلى في العمل السياسي للي قام بيه سيدي محمد بن يوسف ابتداء من سنة 1940… ما يمكنش للباحث أنه ينكر بللي “اتفاقية عقد الحماية” الموقعة بين المغرب وفرنسا في 30 مارس 1912، حافظات بشكل صريح على المكانة التقليدية والرمزية المتميزة للي كانت كاتحظى بها مؤسسة السلطنة العلوية في البلاد. وهاذ الإجراء القانوني والسياسي لعب دور كبير، وكبير بزاف، في المسار للي عرفات المؤسسة على الأقل منذ بداية الأربعينات من القرن الماضي. وفي المقابل، النخب المنتعوتة بالوطنية ما كانش بإمكانها أنها تتجاوز هاذ الواقع القانوني/السياسي، وتتجاوز المكانة الرمزية والتقليدية للي كانت ماتتميز بيها المؤسسة السلطانية. مكانة للي محمد علال الفاسي كايبرر التعامل معاها في كتابة ” الحركات الاستقلالية في المغرب العربي ” (1948) بهاذ العبارات: ” خلال 14 قرن، المغرب ما عرف غير المؤسسة الملكية كنظام للحكم. بحيث أن العرش كان دائما هو رمز الوحدة ديال المغرب، وهو الشاهد على الماضي ديالو، وغادي يكون في المستقبل عامل أساسي للتوازن الاجتماعي ديالو”… هاذ الفكرة للي كاتأسس للممارسة وللفكر السياسي “للحركة القومية”، كايشرحها André Noushi، وهو أحد الباحثين الفرنسيين من “المركز الوطني للبحث الاجتماعي الفرنسي” في عام 1973 على الشكل التالي: “السلطان في المغرب كايجسًدْ في نفس الوقت الماضي السحيق والقوى العميقة ديال البلاد كولها، السلطان هو صلة الوصل معا الماضي، ولكن في نفس الوقت كايمثًلْ المستقبل ديال البلاد لسبب بسيط، وهو أن حتى شي حاجة ما يمكن تًنْجَزْ، وفي جميع الميادين، بلا بيه وبلا الضوء الأخضر ديالو…والدليل على هاذ الطرح هو التربية والتكوين للي تلقًاوه الأبناء والبنات ديالو بدءاً بولي العهد مولاي الحسن” !! ناخذ “البيعة” للي هي أساس هاذ الرمزية السياسية التقليدية… الحماية الفرنسية، انطلاقا من “ترسيم” استعمال القوة المادية والرمزية في ممارستها الواقعية، دارت منها قطب الرحى ديال النظام السياسي برمته بالرغم الهشاشة القانونية للي كانت عندها في السابق كيف شفت معاكوم من قبل في السياقين التاريخي والنظري…بحيث صبحات بالنسبة للحماية الفرنسية، وبالنسبة للطبقة السياسية المغربية، هي العمود الفقري ديال النسق السياسي…بل صبحات عند الجميع هي “الرابطة القانونية” للي كاتترجم التلاحم بين السلطان والأمة…رابطة قانونية مسنودة باستعمال العنف للي صْبَحْ “مشروع” ! وعليه، كان لازم على سلطات الحماية، وعلى المؤسسة الملكية، وعلى القادة ديال “الحركة القومية” أنهوم يوظفو بكثافة هاذ “مؤسسة البيعة” في الشاذة والفاذة، ويجعلو منها وسيلة ناجعة لإضفاء الشرعية السياسية على جميع المبادرات السياسية للي كاياخذوها…ومن تما، بدا الربط العادي بين مؤسسة البيعة وبين السلطان، أو الملك من بعد، كأمير للمؤمنين لجميع المغاربة كممارسة سياسية طبعات من بعد ردود أفعال جميع أقطاب الحقل السياسي المغربي إلى يومنا هاذا !!
