نجم ودادي كبير مغاديش العب ماتش الروتور ديال الوداد مع صان داونز

غادي اغيب اسماعيل الحداد نجم الوداد على الماتش ديال الفريق الأحمر مع ضن داونز، برسم ربع نهائي عصبة الأبطال، بعدما تلقى جوج صفرات، وغادي اتوقف من قبل الاتحاد الإفريقي لكرة القدم.
وغادي اكون غياب الحداد مؤثر لأنه اللاعب الوحيد لكيمتاز بسرعة كبيرة في الوداد، مع بنشرقي لعندي مراوغات جيدة، ولغاب عن الماتش ديال الذهاب لأنه كان عندو جوج صفرات حتى هو.
وكيلعب الحداد دور كبير في تشكيلة الوداد في الجهة اليسرى وكيخلق مشاكل للدفاع عن الفرق المنافسة، والغياب ديالو غادي اقدر اخلي فراغ فهاد المركز المهم.
وغادي اكون الحداد والأصبحي أبرز الغيابات ديال الوداد في الماتش ديال الروتور مع الفريق الجنوب إفريقي، على اعتبار أن الأصبحي كيعاني من إصابة ومغاديش اقدر العب الماتش.
ولكن بالمقابل غادي استافد الحسين عموتة مدرب الوداد من العودة ديال وليد الكرتي لكان مصاب، وبنشرقي لكان موقوف، وغادي اعول عليهم في التشكيلة ديالو باش اربح الماتش وضمن التأهل للمربع الذهبي.
الهزيمة ديال الوداد في مباراة الذهاب بواحد لصفر، كتفرض عليه العب بخطة هجومية باش اسجل وحافظ على الشباك ديالو خالية من الأهداف.