إنفراد. عمر ايت احمد المرشد اللي نقد السويسرية في حوار مع "كود": ما كانتش معانا وغير طوعنا وها شحال قضينا الوقت وحسينا بالحكرة بعد نشرة "الاولى" +صور

أجرت "كود" حوارا خاصا مع المرشد السياحي عمر آيت أحمد اللي انقذ حياة ديك المواطنة السويسرية وكانت غادي تموت فجبال تبقال وحتى واحد مداها فيها ليلة كاملة وهي مليوحة فالثلج.
كود: عاودنا على الواقعة كيفاش بدات؟
جواب: الواقعة كانت يوم السبت الماضي مع 10 ديال صباح مني كانو جُوجْ سُياح أجانب فواحد المكان فالجبل بعد عن تبقال بشي 30 دقيقة تقريبا وبغاو ياخدو صور تما وكانو واقفين فواحد الحافة كولها ثلج وداك الثلج خوا ليه الريح من الاسفل وتهرس وواحد الساعة طاحو لتحت لكن صاحب ديك السوسيرية نقد راسو وبقات هي مسكينة تما وكانت بيني وبينهوم تقريبا شي 5 دقائق ديك الساعة نضت كنجري وهزينا الكاوري والسيد اللي معاه لم نجدها وواحد الساعة وصلنا لواحد المنحذر خطير وكان ارتفاع ديال شي 20 متر وبانت لينا.
كود : واش كانت معاكوم ديك السويسرية هي وصاحبها؟
جواب: لا لا كانو غير بوحدهوم وحنا لقيناهوم غير صفدة ومكانش معاهوم لا مرشد لا حتى واحد.
كود : عملية الإنقاذ شحال خذات ديال الوقت؟
جواب: خذات وقت طويل وحنا تقريبا شي 4 ديال سوايع انهار السبت فصباح وحنا كنقلبو لكن دون جدى ووصلنا لواحد الحد ورجعنا وبتنا ف"روفيج" وانهار الاحد مع 4 ديال صباح درنا الديبار انا وثلاثة ديال دراري صحابي كيعرفو ديك المنطقة اكثر مني وبامكانياتنا جبدناها ونقدناها.
كود : كيفاش علمتو الجدارمية؟
جواب: كان الاتصال انهار السبت بالدرك لكن قالو ملقاو حتى شي حاجة وارسلو مروحية ديالهوم وقلبو لكن ملقاو حتى شي حاجة فالجبل وحنا انهار الاحد مع 4 ديال صباح فطرنا ودرنا الانطلاقة ولقيناها مع 9 ديال صباح لقيناها فالمكان اللي كانت فيه ومزالة حيّة وديك الساعة بدينا كنقلبو على الريزو باش نتصلو بالسلطات وديك الساعة اعطينا شويا ديال العصير وكلات شويا وكان فيها البرد وباغية تخرج من ديك المكان بالزربة.
كود : الجدارمية شكروكوم على داكشي او والو؟
جواب: صراحة مشفت حتى شي شكر
كود : باش حسيتو مني شفنو التلفزة مهضراتش عليكوم وخا انتوما اللي لقيتو السيدة؟
جواب: ضروري غادي تحس بشويا ديال الحكرة وبلا مايجبدوني لكن على الأقل يقولو راه كاينين الناس اللي نقذوها وراه معندهوم مايزيدوني سواء يذكروني او ميذكرونيش وانا درت داكشي لوجه الله وهوما يلا كانوا باغيين يطلعو لكرايد لشي واحد سوقهوم هداك وعلى الاقل يقولو فقط راه تعاونت معاهوم وغامرت بحياتي وكان عندي جوج اختيارات سواء "نعيش او نموت" وكان عندي الآمل فالله.