إييه الريف تهمش طيلة سنين وفيه الفساد فالإدارة والتسيير ولكن راه ماشي بوحدو راه المغرب كلو مهمش من غير بنكرير

في البدأ كانت طحن مو ، هاد الجملة لي خلاتنا نخرجوا على للشارع تضامنا مع شهيد الغباء الإنساني والصدف العبثية محسن فكري ، خرجت باش مرة خرى المخزن يتجنب يحط مواطن مغربي في مثل داك الموقف لي يقدر يخليه يموت ببشاعة ، خرجت تضامنا مع الإنسان ، وحيث حتى أنا حسيت بالحكرة ، وبأن هاديك ميتة مايستاهلهاش بنادم ، وبحكم أنه كانوا رجال ديال السلطة فالمكان ، فراه جات من الجنة والناس أنني نعتابرهم هم السبب، أنا وبزاف خريين ، وجاتنا على الكانة ديك طحن مو ، صدقناها لأننا عندنا تاريخ مع المخزن الحكار وجاتنا ماشي غريبة أنه يقولها ويديرها.
ولكن للأسف صدقات طحن مو غي إشاعة جميلة حركات الآلاف عبر المغرب للتضامن مع محسن فكري ، وصدق السيد مات موتة عبثية بحال العديد عبر العالم حيث الحياة دايرة هاكة ، وبحال هاد الحداش لي ماتو حرقا فالكار مؤخرا فطريق أكادير ، وللأسف مكانش شي جادارمي فالطريق واقف حدا الكار باش نتوهموه أنه قال حرق مهم ، وللأسف ماماتوش شهداء ، حيث مكانش المخزن حاضر ، وطبعا ماغادي يخرج تاواحد يتضامن معاهم في مصابهم هذا ، من غير سيدنا الله ينصرو لي غادي يتكفل بمصاريف العلاج والدفن ، وماغاديش تبان لجنة شهداء محرقة الكار في تنغير وباريز ، وماغاداش تهز الراية ديال إمارة آل بودميعة فالوقفات .
ولكن الآن بالنسبة ليا تام تمييع دم الشهيد ، حيث أصبح دمه وسيلة للمزايدة على الدولة برفع شعارات بالية عمرها نفعات لشي حاجة فالمسيرات ، وتفرق دم الشهيد على اللجان الشعبية والقومية والثورية وبغاو يردو منه بوعزيزي آخر ، لكن للأسف ماكانش البوعزيزي سبب الربيع العربي فتونس ، بل كانوا لعيبات خريين والبوعزيزي غي سبة ، دوك اللعيبات مكيتوفروش فالمغرب ، بالإظافة الى رضى موالين الوقت العالمين على الوضع عندنا ، واخات يموتوا البياعة والشراية ديال الحوت فالمغرب كامل راه مكاينشاي .
إييه الريف تهمش طيلة سنين وفيه الفساد فالإدارة والتسيير ، ولكن راه ماشي بوحدو ، راه المغرب كلو مهمش من غير بنكرير ، والى كان خاص نخرجوا ضد التهميش فراه ماخاصش تربط القضية بشخص واحد ، راه مثلا الى تشدو كاع لي تسببوا فموت محسن فكري وتعاقبوا ، وواليدين محسن حسوا بلي أنه تم رد الإعتبار لولدهم ، ديك الساعة لاش باقي غادي يخرجوا لخريين ، ولكن للأسف راه حتى إحتجاج مدني من أجل مطالب بسيطة منعرفو ليه ، وضروري خاص شي مسجب أو قضية أو شهيد لي نتبناوه باش نقدرو نخرجوا للشارع من أجل مطالب خرى لي يمكن نخرجوا من أجلها بلا مايموت شي حد ، وكالعادة كيتم تمييع أي قضية بثورية لافاك الوهمية وأمية المناضلين وأي قضية تبناوها صافي كتخرى علبى مها ، والله يرحم الشهيد محسن فكري والله يسمح لهادو لي باعو وشراو بدمو .