الله يحضر السلامة. نزل الثلج تقطع الطريق صبات الشتا تقطع الطريق وعشرات المغاربة دوزو ليتهم فالخلا. دارها الثلج فازرو والقنطرة بين طانطان والسمارة

فيضان وادي الساقية الحمرا مازال نتائجو كاينة. الفيضان قطع العيون وطبعا بوجدور والسمارة والداخلة عن المغرب. ملايير تخسرات وترصدات باش هاد ما يوقعش ووقع. سد خلاوه بلا صيانة حتى بان ما صالح لوالو. بعد الفيضانات مشات الحكومة خاصة وزارة الداخلية باش الامور تحل بالزربة ولكن الاصلاحات كانت بطيئة. النتيجة انه البارح ثاني الطريق تقطعات وتسدات بين السمارة وطانطان بسبب قنطرة نفس الوادي.
دابا حسب شهود عيان ل"كود" اكثر من 300 كاميو وكار وطونوبيلة تحصرو. الناس تكرفسات بزاف خاصة اللي مشاو فالكار مع هاد البرد القضية صعيبة. كلشي يتسنى الاصلاحات اللي ديرها مصالح وزارة النقل والتجهيز.
الثلج حتى له تسبب فقطع الطرق. فالطريق بين الراشيدية وازرو تقطات ليلة امس الجمعة والناس دوزو ليلتهم البارح فمركبات الشبيبة والرياضة ومقرات الجمعيات والخيرات ومآوي الشباب والكيران والكاميوات.