ففرانسا تحكم على شيفور مغربي مهرب الحشيش فموك بغرامة قياسية فتاريخ جرائم تهريب المخدرات

تحكم على شيفور رموك كيحمل الجنسية المغربية بالسجن لمدة 5 سنين نافذة، بالإضافة إلى غرامة قدرها 7.7 مليون يورو (8 ملايير سنتيم مغربية)، بعد ما حصل مهرب 770 كيلوگرام من الحشيش ف الرموك.
وتم اعتقال المعني بالأمر، بعد ما فتشات الديوانة الرموك ديالو، ليلة 21 أبريل 2024، حدا معبر لو بيرثوس الحدودي ف جبال البيرينيه. ولقاو عبوات ديال الحشيش مخبية مزيان وكتقدر القيمة السوقية ديالها ف المارشي بنحو 7.7 مليون يورو.
وحسب مواقع إخبارية، فقد تم إلقاء القبض على الشيفور المغربي وتسلم ل الشرطة القضائية ف بربينيان. وتحكم عليه، الأربعاء الفايتة، وتعتبر الغرامة اللي تحكم بها هي الأكبر على الإطلاق ف فرنسا ف جرائم بتهريب المخدرات. وبلغات الغرامة القياسية السابقة 6.1 مليون يورو ف 2019 ضد هولندي.