شنقريحة وتبون ما كيعرفو لا رياضة لا جورة: سعرو ملي شافو خريطة المغرب على صدر بركان وحجزو على تونيات الفريق والكاف كيتفرج

ما بغوش كبرانات الجزائر احشمو، ومواصلين فالقصوحية الراس ديالهم، واليوم الجمعة تعرضو لبعثة نهضة بركان فمطار هواري بومدين بالعاصمة الجزائرية وتعداو عليها.
وحسب مصادر مطلعة، فالديوانا ديال الجزائر اللي محتاجزين بعثة نهضة بركان فالمطار ملي وصلت قبل ساعات، ناضو حجزو على تونيات الفريق حيث فيه الخريطة ديال المملكة المغربية، فتصرف متخلف بتعليمات من كابرانات الجزائر اللي عندهم حساسية من كل ما هو مغربي، وكيتشروط السلطات الجزائرية باش نهضة بركان يدگو خريطة المغرب اللي فالتوني باش يعطيوهم التونيات، وهذا الشي رافضينو البركانييين جملة وتفصيلا، وكيراسلو الكاف باش يلقى لهم حل لهاد الاعتداء اللي تعرضو له من طرف السلطات الجزائرية.
بعثة نهضة بركان اللي مشات للجزائر باش تلعب ضد اتحاد العاصمة الجزائري ضمن دومي فينال كاس الكونفدرالية، كتعيش فمطار هواري بومدين ظروف صعيبة بزاف، وكتحاول ادارة النادي تلقى شي حل مع الاتحاد الأفريقي لكرة القدم، والاخير مطالب انه يدير حد لحاد التطاول ديال عسكر الجزائر استغلالهم لاي ماتش او حدث رياضي فيه منتخب او فريق مغربي طرف باش يسيسوه.