واش تنادم معهم الحال حيث شافوه محيح مع العين؟ نايضة فالأهلي المصري بسبب سفيان رحيمي

قال النجم السابق للأهلي المصري احمد شوبير اللي هو دابا إعلامي فالقنوات المصرية، أن الدولي المغربي سفيان رحيمي كان غيمشي يلعب مع الأهلي المصري.
وكشف أحمد شوبير فراديو ONsports المصري، أنه تلقى مع النجم المغربي سفيان رحيمي لاعب العين الإماراتي، فشي عرس فالإمارات ديال واحد من لاعبين العين، وسولو علاش ما جاش للأهلي، وجابو رحيمي وقال له إن المشكل ما شي فيه حيث كان اتفق مع الأهلي باش يلعب معهم وصافي تفاهمو على كلشي وكان جاي، ولكن المدرب الجنوب إفريقي السابق للفريق المصري بيتسو موسيماني ما بغاهش يجي.
أحمد شوبير، قال إنه ملي قاله سفيان رحيمي الرواية ديالو مشى يتأكد من جهة اخرى، وقصد أمير توفيق مسؤول التعاقدات فالأهلي، وأكد أن داكشي اللي قال له سفيان رحيمي هو الحقيقة وصحيح، وأن المدرب الجنوب إفريقي بيتسو موسيماني فضل عليه الموزمبيقي لويس ميكيسوني لاعب سيمبا التنزاني.
الكلام ديال أحمد شوبير كاين اللي گاعما تقبلو من جمهور الأهلي المصري، وعدد من الأهلاويين كيشوفو أنه محاولة للدفاع على إدارة الأهلي حيث ما وفاوش بكلمتهم مع رحيمي وكاين من الأهلاويين اللي كيشوف أن الأهلي ما قدروش يجيبو رحيمي خوفا من بيتسو موسيماني.
وكان اسم سفيان رحيمي ارتبط بزاف بالأهلي المصري، ملي كان فالرجاء الرياضي، وكانت بزاف ديال المعلومات كتقول فهاداك الوقت أنه غيمشي للفريق المصري، قبل ما يسني مع العين الإماراتي مقابل 3 المليار.
وكيجي كشف احمد شوبير لهاد المعلومات، بعد التألق الكبير ديال سفيان رحيمي مع العين الإماراتي، ومباشرة بعدما حيح فماتش الهلال السعودي فدومي فينال دوري أبطال آسيا البارح الأربعاء وماركا عليهم هاتريك.