وزير خارجية موريتانيا: حنا والمغرب متوافقين على القضايا العربية والإفريقية والدولية وخدامين كنسويو شي ملفات عالقة

Elouali.zaz.1987@gmail.com
علق وزير الشؤون الخارجية الموريتانية، محمد سالم ولد مرزوگ، على الزيارة اللي كيدير للمملكة المغربية، واللقاء ديالو بوزير الشؤون الخارجية والتعاون الأفريقي والمغاربة المقيمين في الخارج، ناصر بوريطة، اليوم الاثنين.
وزير الشؤون الخارجية الموريتانية أكد فتصريحاتو أن البلدين باغيين يطورو علاقاتهم الثنائية، مضيفا أنهما خدامين على تسوية شي ملفات عالقة بيناتهم ومن ضمنها قضية الشاحنات المغربية اللي كتمشي لموريتانيا ورفعات موريتانيا الرسوم المفروضة عليها بشكل فجائي.
وووضح محمد سالم ولد مرزوگ، أن البلدين كيبحثو دائما على المصلحة ديالهم وكلشي غادي يتحل بحكم الروابط اللي بيناتهم، مشيرا فسياق آخر أنه بحث مع وزير الشؤون الخارجية والتعاون الأفريقي والمغاربة المقيمين في الخارج، ناصر بوريطة، القضايا فالمنطقة العربية والإفريقية والدولية، والبلدين متوافقين فوجهات نظرهم.
وأبرز ولد مرزوگ أن علاقات انواكشوط والرباط مبنية على نسيج قوي فيه الدين والدم وهادشي كيزيد يساهم فتقوية العلاقات بيناتهم مستقبلا.
وأشار وزير الشؤون الخارجية الموريتانية فحديثو، أنه جا للمغرب حامل لرسالة شفهية من الرئيس الموريتاني محمد ولد الشيخ الغزواني للملك محمد السادس.