ها نتيجة هجمات الحوثيين ف البحر الأحمر.. زيادات جديدة كتسنى المغاربة مع بداية 2024 بسباب ارتفاع تكاليف النقل البحري بين آسيا والمغرب

قالت تقارير إعلامية، أن تكاليف النقل البحري بين آسيا والمغرب ارتفعات ف السيمانات الثلاثة الفايتة بنسبة تتراوح بين 60 و100 فالمية بسباب الهجمات ديال الحوثيين ف اليمن ضد السفن التجارية الدولية بمنطقة البحر الأحمر. وهاد الشي ضروري غادي يكون عندو تأثير على أسعار بعض المواد اللي كيجيبوها التجار والشركات المغربية من الشينوا..
وقال مصدر مغربي لوكالة الأنباء الإسبانية، أن "تكلفة نقل كونطونير 20 قدم من شنگهاي إلى الدار البيضاء ارتفعات من 1450 إلى 2800 دولار (من 1324 إلى 2557 أورو) منذ 15 دجنبر الفايت"، مضيفا أنهم كيتسناو حتى منتصف الشهر الحالي باش يعرفو عاوتاني واش التكاليف غادي تتغير.
وحسب التقارير ذاتها، يمر ما يقرب من 15 فالمية من التجارة البحرية العالمية عبر البحر الأحمر، بما في ذلك 8 فالمية من تجارة الحبوب العالمية، و12 فالمية من تجارة النفط البحرية العالمية، و8 فالمية من تجارة الغاز الطبيعي المسال العالمية.