بالوطيلي كان غيموت فكسيدة خايبة.. فرشخ طوموبيلتو وحيدو ليه البيرمي

دار الطالياني ماريو بالوطيلي لاعب أضنة سبور التركي، كسيدة خايبة بالطوموبيل هاد اليومين فمدينة بريشيا فالطاليان، كان غيموت فيها حسب ما ذكرت وسائل إعلام أوروبية، وسط شكوك بأنه كان مفوت فالشراب.
وحسب موقع "سبورت ميدياست" الإيطالي، فماريو بالوطيلي دخل بالطوموبيل فالحيط بعدما فقد التحكم فيها حيث تفركعت له الرويضة.
نفس المصدر، وضح بلي ماريو بالوطيلي ما وقع له والو فالكسيدة، ولكن الطوموبيل ديالو اللي ساوية 115 ألف أورو تفرشخات.
وبعد الحادث جاو البوليس بغاو يديرو له اختبار ديال الكحول باش يعرفوه واش شارب، ولكن بالوطيلي ما بغاش وهوما يحيدو له البيرمي.
وكاين ماريو بالوطيلي النجم السابق لمانشستر سيتي وليفربول وميلان وعدد من الفرق الأوروبية، (كاين) فالطاليان كيتعالج حيث موعت.