الركراكي بدا كيوجدو الأسود لماتش الكوت ديفوار وليبيريا وأجواء زوينة فمركز محمد السادس

بدا المنتخب الوطني المغربي اليوم الاثنين فمعسكر محمد السادس فالمعمورة، كيوجد للماتشات بجوج اللي عندو ضد الكوت ديفوار فمباراة ودية وضد ليبيريا فماتش مؤجل عن منافسات اقصائيات كاس أفريقيا.
وجمع الناخب الوطني وليد الركراكي والطاقم التقني ديالو اللاعبين اللي دخلو اليوم للمعسكر التدريبي، داير ليهم حصة تدريبية هذه العشية فسونطر محمد السادس، وسط أجواء زوينة، هي الحصة الاولى للأسود فهاد المعسكر.
وعرف اليوم وصول أغلب عناصر المنتخب المغربي بحال أشرف حكيمي وامين حارث وعز الدين أوناحي وأيوب الكعبي وأمين عدلي وآخرين، وراه خدام معاهم الركراكي والطاقم التقني ديالو على الكوطي فيزيك باش يحيدو منهم عيا السفر والماتشات اللي لعبو مع فرقهم الويكاند اللي فات.
الاجواء داخل المنتخب الوطني المغربي زوينة بزاف، وغدا غتكمل صفوف ليكيب ناسيونال ملي غيصولو اللاعبين اللي مازال ما جاو حيث كانت عندهم التزامات مع فرقهم، ويبداو كاملين يوجدو الماتش ضد كوت ديفوار فأبيدجان السبت الجاي، وضد ليبيريا الثلاثاء اللي بعد منو فأكادير.