مصدر من الداخلية ل"كود": الصحافيان الفرنسيان ما عندهمش اعتماد وكذبو على شرطة الحدود وقرار الابعاد خداتو السلطة الادارية لهاد السبب

اليوم فالصباح طرد المغرب الصحافي الفرنسي كوينتان مولر والمصورة الصحافية تيريز دي كامبو اللي كيخدمو مع مجلة "ماريان". حسب مصدر من وزارة الداخلية ل"كود" فان قرار الابعاد خداتو السلطة الادارية ونفذاتو الشرطة المكلفة بالاجانب. هاد الشرطة كانت مشات سيڤيل =حقاش ما كتلبسش الكسوة= مع الثلاثة الصباح فاوطيل فكازا وعلمات الصحافيين
وفق مصدر "كود" فان هاد الصحافي وهاد المصورة دخلو للمغرب بهوية مختلفة. قدم راسو بايزاجيست ونزل فمراكش ومن بعد طار للرباط. مصدر "كود" قال ان جميع الصحافيين والصحافيات فوسائل الاعلام العالمية اللي بغات تخدم فالزلزال طلبات اعتماد من وزارة الاتصال وباش وصلات للمطار قدمات راسها كصحافيين وصحافيات٬ عكش هادو اللي تم ابعادهم اليوم.
الصحافي كوينتان مولر كان دار تدوينة قبل قليل قال فيها باللي باغي يدير تحقيق علي "العنف الاقتصادي والاجتماعي" ديال المخزن. وقبلها قال باللي عندو تحقيق على الملك. اي ما عندو علاقة بالزلزال. استغل هاد الحدث باش يدخل للبلاد بلا ما يكشف على هويتو.