زلزال الحوز.. مساعدات طنجة للضحايا غادية وكتزاد ولكن بلا فضايح ماشي بحال رئيس اتحاد طنجة اللي رجعها حملة لحزبو راه خصو يتعلم من اللي سبقوه فالفرقة

طنجة بحال كاع المدن المغربية رسلات بزاف ديال المساعدات لضحايا زلزال الحوز وتارودانت وأزيلال... من هاد المساعدات جوج رموكات من الأغطية ولگياطن والمواد الأولية، رسلهم رئيس اتحاد طنجة الأسبق حميد أبرشان، رسلهم بصفة شخصية وبلا هايلالة وبلا ما يرجع من هاد التصرف العادي حدث، كيف دار رئيس اتحاد طنجة محمد الشرقاوي، اللي عندو كاسكيطة سياسية باعتبارو رئيس مقاطعة طنجة المدينة باسم حزب الحركة الشعبية.
الشرقاوي رجعها حملة انتخابية بحضورو لكبير فكل تفصيلة ونشر داك الشي فصفحتو. دار بحالو بحال هادوك الانفلونسر
باش تعطي وتساعد مزيان ولكن علاش تروج هاد الشي وبهديك الطريقة؟، كون تحشم وشوف كيفاش تعاملو طنجاوا لخراين مع الحدث المؤلم.