عبر اولمبيك مارسليا الفرنسي عن التضامن ديالو مع المغاربة على خلفية الزلزال اللي ضرب البارح الجمعة منطقة الحوز، واللي الخسائر ديالو كبيرة ووصلت إلى حدود السابعة من صباح اليوم السبت إلى 632 وفاة، و329 مصاب، والحصيلة قابلة للارتفاع. وخرج أولمبيك مارسليا غير دابا على مواقع التواصل الاجتماعي وعبر على التضامن ديالو مع المغرب والمغاربة، وقال: "نادي أولمبيك مارسيليا كيقدم خالص تعازي ديالو ومواساتو لعائلات ضحايا الزلزال اللي ضرب المغرب، وبالشفاء العاجل للجرحى". للاشارة فأولمبيك مارسيليا ارتبط المغرب بزاف من خلال بزاف ديال الكوايرية مغاربة لعبو فيه، واخرهم أمين حارث وعز الدين اوناحي اللي كيلعبو معه حاليا، وراه كاينين مع المنتخب المغربي فأكادير حاليا حيث مبرمج ماتش بين المغرب وليبيريا اليوم السبت فأكادير في انتظار الساعات المقبلة الحسم واش غيتلعب ولا غيتأجل بسبب زلزال الحوز اللي وصلت الخطورة ديالو إلى اكادير. وتضامن حتى ريال مدريد الاسباني مع المغرب، وخرج هذا الصباح، ببلاغ قال فيه: "يعيرب نادي ريال مدريد لكرة القدم ورئيسه ومجلس إدارته عن عميق فزعهم وتضامنهم مع ضحايا الزلزال الذي تعرض له المغرب في الساعات الأخيرة". وكمل ريال مدريد: "كيوجه النادي التعازي والحب ديالو لأقارب الضحايا ولجميع الشعب المغربي، كنتمناو الشفاء العاجل للجرحى".
