جماهير الرجاء كتاسحت تيران الرباط قبل فينال كأس العرش وحضور قليل للبركانيين

كيعرف تيران مولاي عبد الله بالرباط حضور كبير لجماهير الرجاء الرياضي وهذا الشي قبل ساعتين تقريبا من ماتش الفريق ضد نهضة بركان، اليوم السبت ضمن نهائي كاس العرش.
جماهير الرجاء الرياضي جات بأعداد كبيرة فديبلاصمون من كازا للرباط، باش تشجع الفريق ديالها وإجتاحت مدرجات تيران مولاي عبد الله، وراه الرجاويين خذاو البلايص كثر من البركانيين اللي الحضور ديالهم قليل بزاف إلى حدود الآن، مع العلم أن مشجعين الخضرا مازال كيجيو للتيران.
وعرف التنظيم ديال الدخول إلى تيران مولاي عبد الله بالرباط قبل انطلاق ماتش فينال كاس العرش، انفلاتات بالمحيط د الملعب والابواب ديالو، وهذا الشي كيسأل اللجنة التنظيمية المسؤولة على إقامة الماتش ، حيث بزاف من المشجعين د الرجاء ما عندهمش تذاكر فالوقت اللي كيتباعو تيكي فمارشي نوار سوا بفيسبوك أو بمحيط التيران، ومن الفوق كيتطرح سؤال أكبر واش معقول يتم توزيع عدد التذاكر د الماتش وهو 30 ألف، بالتساوي على جماهير الفريقين، واخا قاعدة جمهور الرجاء كبر من جمهور نهضة بركان.