الرجاء وطنجة سالاو بتعادل ما فمصلاحة حد والمحمدية أكبر المستفدين ففرق أسفل الترتيب

تعادل فريق اتحاد طنجة مع الرجاء الرياضي اليوم الأحد بالتيران الكبير لمدينة طنجة زيرو لزيرو، برسم الدورة 26 من البطولة الاحترافية لكرة القدم.
الماتش بين اتحاد طنجة مول المركز الأخير والرجاء، عرف حضور كبير للجماهير الطنجاوية والرجاوية، وكملوه الفريقين بنقص عددي بعد الشوط الثاني طرد محمد بولكسوت من الرجاء وأميان جوي من اتحاد طنجة بسبب الخشونة.
وبعد نهاية هذا الماتش بالتعادل خدا كل فريق نقطة، والنتجية كتبقى سلبية بزاف للطرفين، وخصوصا اتحاد طنجة اللي ماشي فمصلاحتو التعادل، وظل فالمركز الأخير من البطولة برصيد 22 نقطة، أما الرجاء اللي خسرو سباق المنافسة على اللقب خسرو هاد المرة حتى المركز الخامس ورجعو إلى المرتبة 6 برصيد 36 نقطة.
وفي نفس التوقيت، كانو باديين ماتشات آخرين ديال فرق كتنافس على البقاء، ومنها قمة أسفل الترتيب بين أولمبيك خريبكة والدفاع الحسني الجديدي واللي سالات بالتعادل الإيجابي واحد لواحد، وبالتالي ظلت خريبكة مع اتحاد طنجة فالمركز الأخير برصيد 22 نقطة، والجديدة فالمركز 14 وعندها 24 نقطة.
أما مولودية وجدة الفريق المحتل للمركز 13 فخسر مع نهضة بركان فديربي الشرق، وسالا الماتش بين الفريقين بنتيجة 2 لواحد لمصلحة البركانيين، وبقاو الوجديين فالمركز 13 برصيد 25 نقطة، أما بركان تحصلو على 3 نقاط رفعو بها رصيدهم إلى 37 نقطة وطلعو إلى المركز الخامس.
وكان فريق شباب المحمدية هو أكبر مستفيد من فرق أسفل الترتيب، حيث ربح شباب السوالم بنتيجة 3 مقابل واحد، وخدا 3 نقاط مهمة خلاتو يرفع الرصيد ديال إلى 31 نقطة وطلع إلى المركز 10، أما السوالم بقاو فالمركز الثامن برصيد 33 نقطة.