سخونية الراس كترجع بالبرودة.. تولوز ما بقاوش باغيين بوخلال والفضايح ديالو

كشفت تقارير إعلامية فرنسية جديدة اليوم الثلاثاء، أن نادي تولوز الفرنسي ما بقاش باغي يخلي الدولي المغربي زكرياء بوخلال عندو بالفريق، وهذا الشي بعد فضيحتو مع نائبة عمدة مدينة تولوز.
وحسب موقع "فوت ميركاتو" الفرنسي، فنادي تولوز باغي يتخلص من اللاعب المغربي زكرياء بوخلال، حيث صبح كيحس بالاحراج من الحوادث المتكررة المرتبطة باللاعب المغربي، من بعدما كان دافع عليه بعد مقال نشرو موقع "أش كاين" خلال دجنبر الماضي حول ارتباط اللاعب بنشر افكار السلفية.
وحسب الموقع الفرنسي فإن ارتباط إسم زكرياء بوخلال بالحملة العكسية اللي دارو شي كوايرية ضد حملة دعم المثلية الجنسية بفرنسا، وتزعم النجم المغربي للحملة العكسية بفريق تولوز، وما تنشر بعدها بالإعلام الفرنسي عن مشادات بينو وبين نائبة عمدة تولوز لورانس أريباجي، اللي طلبت منو هو وصحابو بالفريق يسكتو شوية من الصداع حيث مدربهم كان كعطي كلمة بمناسبة التتويج بكأس فرنسا وجاوبها هو وقاليها "عندنا، العيالات ما كيهضروش هكذا مع الرجال"، كلها عوامل خلات المسؤولين ديال تولوز يفكروا في التخلي عن اللاعب، اللي حتى هو بدا كيقتنع أن بلاصتو ما بقاتش بالفريق الفرنسي.
للإشارة فإدارة تولوز الفرنسي تفاعلت مع ما نشرو الإعلام الفرنسي واعتبره بالادعاءات الخطيرة، وقرر أن اللاعب زكرياء بوخلال يتدرب بعيد عن المجموعة ديال الفريق حتى إشعار آخر ، وذلك بانتظار نتائج التحقيق الداخلي.