برسمك فوق الشوارع

..
بصى تحتك هتلاقينى يا حبيبتى بحر دم
برسمك فوق الشوارع
باشربك وقت المواجع
باركعك جوا الجوامع
أعصرينى هتلاقيكى جوا منى ألف هم
كل ما امشى طريقى ليكى تمنعينى بالحواجز
تبعترينى ألملمك
تهجرينى أكلمك
تجرحينى أقبلك
و أملك الكون ده ف إيديا تحسسينى إنى عاجز
شايفه كرباكك معلم و لسه برضه باعبدك
ورده فيكى أتزرع
جدر مادد ما اتقلع
شمس فيكى أندلع
زى نسمة أحضنك و أضم فيكى أهدهدك
ساكته ليه ما تنطقى أو أصرخى فيا أصرخى
أو ألطشينى بالقلم
و حسسينى بالألم
و فوقينى م العدم
و أنفضى عنى الغشاوة و جوا روحى أنفخى
يا حبيبتى إنطقى مش هو دا وقت السكوت
حلمى فيكى بيتخطف
و تعبى ليكى بيتقطف
حتى بكره بيتنسف
و إنتى ملفوفة بقيودك مستسلمه للموت
عليا ردى عبرينى هو أنا هاشحت ودادك
ينهبوكى بربرك
يخطفوكى عسكرك
أجرى ليكى أحررك
تتركينى و تحضنيهم هو أنا مش من ولادك
طب قولى لى ريحينى إن أنا مش إبن نيلك
و انتى عاشقة حد غيرى
و ان شجرك مش لطيرى
ولا مصيرك كان مصيرى
رغم إنى قتيل بحبك و كان شفايا سلسبيلك
بصى تحتك هتلاقينى يا حبيبتى بحر دم
باندهس جوا الشوارع
و اختفى ويا اللى راجع
شهيد بتندهنى الجوامع
و المدارس و الكنايس و كل قلب و كل فم