أو هنا طاح لوزير إحتفل «الضيف الخامس» بمرور مائة حلقة من عمره، ولهذه الغاية أحضر طاقم البرنامج حلوى كبيرة وسكينا أكبر، ولأن الحلقة استثنائية، فإن الضيف لا بد أن يكون استثنائيا.. فهل وزير الشباب والرياضة منصف بلخياط كذلك؟ نعم، باعتباره أكبر مسؤول عن الرياضة في البلاد، لكن كان يمكن أن يكون حضوره استثنائيا فعلا لو ما كانش هاد الوزير طالي الدنيا بالتصريحات ديالو، ها هو في الراديو، ها هو في التلفزة، ها هو في الجورنال... فالوزير يحب الكلام كثيرا، ويحب أن يتحدث كثيرا.. وإذا لم يكن لديه أي لقاء مبرمج، كيمشي لشي دار الشباب على غفلة، وكيجمعوا ليه عباد الله باش يدوي، وهو بهذا يذكر المغاربة بسلفه طيب الذكر محمد الكحص الذي يشترك وبلخياط في كثرة الظهور والكلام والإدعاء بخلق ثورة حقيقية داخل الوزارة، غير بلخياط جايب معاه الثورة بحال ديال ميريكان، والكحص كانت عندو الثورة بحال ديال ليبيا، من الجامعة الشعبية حتى المخيمات اللي كتضوّي بالشمع. ما عندك ما تْسال الوزير، راه تْواضع وجا لعندهم. آش من تْواضع؟ ها داك كون بغاو يجيبوه في الحلقة النموذجية ديال البرنامج، ما يقولش ليهم لا. سمعتهم قالوا بلي عام هادي باش عرضوا عليه وما بغاش. علاش حتى لدابا عاد جا؟ إيوا حتى تعلّم مزيان. راه كان ديك الساعة يالله جا للوزارة باقي ما فاهم والو، مالك كنتي بغيتيهم يغنيوا عليه: «أو هنا طاح لوزير، أو هنا نلعبوا عليه». رغم الظهور المتكرر للسيد الوزير، إلا أن له دائما ما يقوله، إنه شخص يثير الحماس في من ينصت إليه، لأنه يحمل دائما الجديد والأخبار السارة لعموم المواطنين الذين لم يعودوا قادرين على تصديقه.. وفعلا، كان يبدو عليه في بداية الحلقة أنه حافظ آش غادي يقول، وحاضي راسو مزيان.. فبعد الكلمة الترحيبية المرتبكة نسبيا، انطلق لسانه في تعداد الإنجازات والأوراش الثورية المفتوحة بالأرقام التي تجعل المنصتين إليه يكتفون بتحريك رؤوسهم، وتجعل المشاهدين معجبين بهذه القدرة الرهيبة لوزير ذي منصب سياسي على الإلمام بتفاصيل تقنية وإدارية يلمّ بها عادة أصغر مساعديه.. وطيلة هذه الفترة التقديمية، أثار الوزير إعجاب المحاورين والمشاهدين.،لكن بعدما بدأت الأسئلة، حافظ الوزير على الطلاقة في إجاباته، مع ارتباك واضح في المعنى، وكشف عن سر عدم تحقيق ما يعد به دائما، حيث قال ما معناه: «أنا ميريكاني في دماغي، ملي كنبغي نحقق الهدف (ب)، كنقول غادي نحقق الهدف (أ) اللي أكبر منو، باش إيلا ما قدرناش نوصلو (أ)، فعلى الأقل غادين نوصلو (ب)، وبالتالي غادي نكونوا حققنا الهدف الحقيقي اللي بغيناه من الأول». ما فهمت والو. يعني، إيلا الوزير في الحقيقة كان باغي مثلا يمشي من كازا غير للجديدة، كيقول للشيفور ديني لمراكش، باش إيلا سالا ليهم المازوط في أزمور كيكون هو قضى الغرض. هي قول الوزير غير كيسرح بنا طالق السْلوكية؟ على هاد الحساب ما عمرنا غادين نتيقوا بيه. حتى هو قالها: هاد الشي اللي عطى الله. ميريكاني في دماغو، وفيه عيب واحد. لقد اعتقد الكثيرون أن منصف بلخياط أخفق في تنفيذ وعود سابقة، قبل أن يكشف عن سر ذلك في البرنامج.. فالسيد الوزير عندو عقلية الميريكان، كيقول حاجة ولكن عينو في حاجة أخرى.. وهذه مشكلة، إذ كيف سنعرف أن الأهداف التي يعد الوزير بتحقيقها هي التي فعلا يريد أن يحققها، وليست أهدافا أخرى أقل منها طبقا لفلسفته التي أعلنها في هذه الحلقة؟ كيف سنصدقه؟ إنه تماما مثل ذاك الرجل الغني الذي جاء إلى إحدى الأسر طلبا للزواج، فقال لوالد الفتاة: «أنا عندي بزاف ديال المزايا، عندي خمسة الفيلات، وربعة الشركات، وخمسين طومبيلة، وعشرين مليار... ولكن فيّ عيب واحد ولازم نقولو ليك». رفض الأب في البداية أن يسمع هذا «العيب» لأن لنا كلنا عيوبا. لكن الرجل ألح كي يقول «عيبه»، فقال: «عيبي الوحيد أنني كداب كبير، يعني زفّاط». سمعتيه آش قال على المدرب الوطني، قال ليك ماندوزا ورباعتو خاصهم يمشيو يقراو شوية عاد يدريوْ. هادي ما قال فيها عيب. ولكن ملي اعترف بأن الزاكي عندو المواصفات العالمية، ما قدرش يقول لينا علاش ما جابوهش للسلكسيونا. ما يقدرش أسي، القضية أكبر منو، وما سمعتيهش ملي قال ليك بلي كان فرحان بأن الجامعة سدّات ودنيها بالقطن تسع شهور، باش ما تسَوّقش للمطالب ديال الجماهير. حتى هادي ما فيها عيب.. إيلا الجامعة ما لقاتش اللي يجبّد ليها الودنين، علاش ما تديرش فيهم القطن؟ نافذة ميريكاني في دماغو، وفيه عيب واحد منير باهي
