زوادتك ف احشاك

توسدت وجعي
و غفيت على رجايا
و شفت شللا حوايج
ف تيهي
اللي فات و اللي مازال
يلا كان اللي جاي
أكتر من اللي فات
يا حيرتي
و يا وليعة حالي.
اللي ف حقي ندوزو
و اللي جابها
الزمان تعدي
قالوها اللوالا:
عدّات و بدّات
و خدات معاها
طرف من الدات.
و آش بقى ف الدات
ما تاخد هذيك
اللي مازال ما عدّات ؟
عارف الوجع
يخللي مولاه يهلوس
و الدات الصحيحة ترزم
و النفس العالية تشد الأرض.
المريض لا حرج عليه
بالحق اليوم
ما بقى حد يعذر
الشكوى مذلة
و الوهن عاهة
و اللي نطق آحياني
يرميوه ف بير
غارقة منسية
و ما يبقى حد
يحسب بيه.
قلت لراسي
اجمع راسك
و لصق طرافك
اللي بقات
و تدفى بيها
و تحصن بعزمك
و خللي عنايتك
هي زادك ف ايامك
ما يجيك جوع
زوادتك ف احشاك
و لا تحس بحريق
دير من داك دواك.