مستجدات النكت والأبراج

نتمنى أن لا تعجبكم هههه


هذو واحد 2 مشاو لواحد المطعم باش يتغداو . واحد طلب العدس و التاني طلب الدجاج محمر . هذاك للي طلب العدس تياكل باليسرى و هو يقول ليه صاحبو راه الشيطان تياكل معك . و هو يقول ليه : مال هاد الشيطان مكلخ غادي يخلي الدجاج محمر و ياكل العدس.
*****

هادا واحد الدري جرى عليه الأستاد ديال لانفورماتيك
مللي مشى عند الحارس العام، قال ليه: مالك أولدي؟
قال ليه التلميد: جرى عليا مول السيبير .
*****

هدا 2 صحاب a و b اتفقوا باش يرجعوا يتعاملو بحال في العصر القديم . لاحوا البرتابل أشراو الحمام . أبقاو كيصيفتوا الرسائل عن طريق الحمام. واحد النهار صيفت a الحمامة لb بلا رسالة . ملي اتلاقاو الغد سول علاش صيفتها بلا رسالة قليه رغير بيبينا علك أصحبي
*****
هاذا واحد العروبي مشى عند الطبيب يدوز قالو الطبيب فيك السكر قالو العروبي واش قالب او لا سنيدة.
*****
المرا قالت لرجلها اطلع لسطاح وشوف هلال فاتح رمضان واش كاين في السما واش غدا غدي نصومو وقولها ليا من الفوق..
الرجل اطلع السطاح وشاف الهلال ضاوي وقال لمرتو وكاين وشويا قال ليها ومكاينش وشويا قال ليها وكاين ومكاينش.
المرا تعاصبت وطلعات عندو لسطاح وهو يقول ليها ها هو هاهو وقالت لو مرتو الله يعطيك المسخ الهايع .هداك راه غير لهلال ديال الصيدلية اللي في الحومة كيتشعل ويتطفا . لعيالات عندهم الرجالة ونا عندي مصيبة مسلطة.
*****

أبراج

_ لخروف ( 21 مارس / 22أبريل )
التعب بان عليك هاد ليام عليك بالراحة والماكلة، شي خدمة كتقلب عليك وجد راسك، ماديا الدرهم الله يجيب تفارق مع العصبية والسهير بالليل، الحبيب ديالك توحشك وراه متفاهم معك سمع كلامو وصبر معه باش ترتاح، الفلكي عطاك صفة البحر.



_ لعجل ( 23 أبريل / 20 ماي )
الصيف خلاك لا زين لا مجي بكري لفران عندك مخسر، لعواشر قريبة زير راسك رمضان كيحتاج العاقة تكون موجودة، الحب عندك فيه الديفو شي حاجة فيك غلط، دّيها فراسك وتفارق مع صحاب الليل، المنجم عطاك لقب العصفور الجريح.



_ تويمات ( 21 ماي / 21 يونيو )
هاد السيمانة راك شاد الطريق الصحيحة سير على هاد الحال باش تفوز، الصحة والمال بين يديك عرف كيف تسير امورك الشخصية ومتخليش العاطفة تغلب عليك الحب غادي يجي مع الوقت، راك تستاهل صفة البطل بدون منازع هاد الأسبوع.




_ المرض الخايب ( 22 يونيو / 22 يوليوز )
الخير فين ما كان ينفع المهم يكون، الصحة بانت عليك شي شوية تهلا بالراحة والمعالجة، لعواشر دايرة بك هذا وقت الدرهم، متخليش الأعصاب يخرجوا عليك، الحب عندك بين يدّيك تهلا فيه راه يستاهل، عطيناك صفة الفهد.




_ السبع ( 23 يوليوز / 22 غشت )
الغرور خرج عليك غير درتي لفلوس والشهرة بغيتي طير، تواضع مع صحابك وجيرانك، الخدمة عندك مزيانة فيها الصرف ولكن الصحة عيانة، الحب كيبغي الثقة والإخلاص قفرتيها مع لحبيبة سير داويها، المنجم عطاك صفة التمساح.





_ العزبة ( 23 غشت / 22 شتنبر )
الطريق عندك بخير زيد خدم باش تجمع راسك فهاد الصيف، الصحة هي راس المال والعناية بالنفس ضرورية للحياة، عليك بالصبر والمعاملة الطيبة مع صحابك، الغيرة ديالك هي سباب مشاكلك مع الحبيب ديالك راه كيبغيك، تستاهل صفة الحنونة.





_ الكفة ( 23 شتنبر / 22 أكتوبر)
كل مصيبة تجربة مازال الطريق بين يديك والمستقبل فيه الخير، صحتك مزيانة راك قادر تنتج وتعطي الافضل، لفلوس حنا كنجيبوهم ماشي هما كيجيبونا شوف شي خدمة جديدة، الحب كيجيبلك صداع الراس تفارق معه، راك الدرويش هاد السيمانة.





_ سكوربيون (23 أكتوبر / 21 نونبر )
كلام المسلسلات غير وهم ماشي حقيقة ديها فجنابك وصحتك، الخدمة عندك عيانة بدل العتبة باش تهنا، العاقة هاربة عليك هاد السيمانة وجد راسك رمضان فالطريق، الحب ماعندك ما دّير به فيه غير تحماق الراس، الفلكي عطاك صفة الواد.



_ قوس قزح ( 22 نونبر / 19 دجنبر )
راك سانك سانك هاد الأسبوع فرحان ومرتاح ماديا ومعنويا، الدرهم جا مجموع ولمسارية خلاتك تحس براحة البال، عليك بشي خدمة واعرة باش تمشي للدار تجيب لحبيبة راها عيات من الدوران فالحومة، هاد السيمانة انت المسعود.





_ العتروس ( 20 دجنبر / 19 يناير )
راك فتقدم درتي بالنصيحة ديال صحابك برافو عليك، زير فخدمتك باش تكون بخير مستقبلا، وتفارق مع المشاكل وكلام الناس، ناقصاك شي مسارية باش تكون واجد لرمضان، الحب عندك طالع لفوق بزاف، تستاهل لقب الصياد الصغير.






_ السطل ( 20يناير / 18 فبراير )
كاين فرق بين بنادم خاوي و بنادم عامر، الصحة كتلعب دور كبير فالعمل وجمع العاقة، فالصيف كتبات مساري وفلعواشر كتشكي من قلة العاقة زير راسك راك متبوع بالمسؤولية لحبيبة بغات راجل ماشي كوادرو، عطيناك صفة البوهالي.


_ السردين ( 19 فبراير / 20 مارس )
مازال عندك السويرتي السيمانة الثانية كلشي عندك بخير الصحة راك بحال كينكو لفلوس موجود الخير فالجيب صحابك متعلقين بك، شي ناس عينهم عليك من تحت لتحت رد البال الطمع طاعون، لحبيب توحشك، تستاهل صفة المحظوظ.

من إنجاز الفلكي رشيد يشو