هاد البْببلاد ما عطاتنا والو !!

كتلقاه خارج من السانكياماني بسبب تكلس المادة الرمادية في الدماغ، وفاطر بجوج بيضات ونص يطرو دزيت العود مع “الكيصو” بكل نهم .. ومطراسي اللحية أحسن من كمال الدين أغلو .. ومدوش بهايدانتشولدرز بالنعناع وعلامات الصحة والعافية تلمع في وجهه الشديد القصوحة ، ولابس لفوقي ديال “تشاندار” أديداس فلحمر ، مزيرلو على الطرابيس .. وتاهو واقف فالتشالي ديال مرتيل كيقول بيبا اسبانيا.. الشعب يريد الحرْكَة فابور .. هاد البْبببلاد ما عطاتنا والو … شنو بغيتيها تعطيك يا عدو الله ، زعما جايب لينا ميدالية ذهبية فأولمبياد سيدني !! هاد البلاد راه معطاتش حتا للناس للي حرروها من الاستعمار ، معطاتش حتى للي كيشدو العتلة من طلوع الشمس الى غروب الفجر ! معطاتش حتا للي هزو المحفظة والدفاتر 22 عام وخرجو يخدمو على راسهم عشرين عام اخرى وباقين لحد الساعة مكيشيطلومش من الصالير حتى باش يشريو داك الفوقي ديال “التشاندار د أومبرو ” فاللخر ديال الشهر … كيفاش بغيتيها تعيطيك وانت مع أول مشروع زودياك فابور، بديتي كتزغرت لينا بيبا اسبانيا !!! كيفاش بغيتيها تعطيك وأنت باغي تحرك من قدام القهوة ديال ملتقى الأسر .. ما طلعتي فجبل مهربتي من جوندارم ، مشريتي شومبرير باش تغرق فأطول وقت ممكن، ما تكركبتي من “بليونش” حتا شدوك لمخازنية !! .. يلاه ساليتي الفراجة فالماتش ديال المدريد مع خطافي وخرجتي مباشرة تهتف باسم “الشعب ” بيبا اسبانيا !!! كيفاش بغيتيها تعطيك وانت لحد الساعة باقي مكملتي حتا لاكارط ناسيونال ديالك بالقرايا .. الوضعية ف البلاد مكفسة فعلا، لكن انت اكفس منها .. وياريت ربي يسهل عليك تحرك للخاريج ، غير باش نقصو علينا داك جوج كوميرات لي كتاكلهم فالصباح ونزيدوهم فالبغرير ديال المطعم المدرسي فشي عروبية مقطوع عليها الفيسبوك ..!
بصراحة الاغلبية بحال هادوك لي كانوا فالتشالي ديال مارتيل باغين يحركوا… من هاد الميمبار خصنا نخليوهم يحركو ، بل ونطلبو السلطات تعاونهم بالمتريال ديالها يقلعوا علينا ..ومن هاد الممبر أهيب بالمسؤولين على الحدود هوما لي يسلفولهم الزودياكات لي يهزوهم لطريفة ، واذا امكن شي قافلة طبية ديال المساعدين النفسيين ترافقهم حتى للشواطئ الاسبانية ، عنداك يتنادم معاهم الحال ويتمو راجعين لينا هنا عوتاني.. اذا كنت اخي العزيز تنادي “بيبا اسبانيا” بوجهك احمر بحال عصير الباربا ، فغير سير لي سبانيا وخلينا نوفروا داك البيض وزيت العود لي كتلهط لينا كل صباح لا خدمة ولا قرايا زينة .. البلاد معطاتك والو وانت كتافك اعرض من ” إيسن بولط” راه معمرها تعطيك اذا بقيتي جالس مقابل الكورنيش ديال باب سبتة ..والحاصول هادشي لي كيوقع اهانة ما بعدها اهانة فحق الحريك والحراكة !!
الخلاصة الزودياك لي يشركها معاكم الواحد حرام توصل حتى للعرايش !!
#عطيوني_”التشاندار “_ديالي نركب بيه فالفونطوم ديال رجال الدرك.