كاريدو: الماتش ضد فيتا كلوب ما ساهلش ولكن عندي الثقة فالوداد وغاندخلو باش نربحو

أكد كارلوس غاريدو مدرب الوداد الرياضي أن الفريق الأحمر واعي بالمسؤولية اللي عليه فليماتش الجايين، وأن المرحلة المقبل غتكون حاسمة بداية من الماتش ديال غدا الجمعة المؤجل من الدورة الأولى فعصبة أبطال إفريقيا أمام فيتا كلوب الكونغولي وقال بلي ما غايكونش ساهل.
وتحدث كارلوس كاريدو مدرب الوداد الرياضي فالندوة الصحافية اللي كتسبق ماتش الواك وفيتا كلوب وقال: "ليماتش الجايين راهم مهمين وحاسمين، والأهم دابا هو نركزو على الجانب النفسي والمورال ديال اللاعبين والبدني، حيث ماشي ساهل تلعب ماتشات كثيرة فمدة قصيرة".
وشدد كاريدو على أنه واخا كاينين إكراهات ولكن الوداد عندو كاريزما قوية وقال: "عندي الثقة فالكروب حيث الوداد شخصيتو قوية كفريق، صحيح غنلعبو مع فريق قوي ولكن راه خاصنا نفرضو الأسلوب ديالنا ونربحو فالتيران ديالنا، وضروري نديرو احتياطنا من فيتا كلوب".