سيمبا كيوجدو للرجاء ورئيسة تنزانيا خصصت مكافأة بالملايين للرباح والبدراوي مصيفط الخضرا فرحلة مسخسخة

كتوجد تنزانيا كاملة مع فريقها سيمبا لاستقبال الرجاء الرياضي فالجولة الثانية من دور مجموعات دوري أبطال إفريقيا لكرة القدم، وباغيين يربحوه وهادشي من الجماهير التنزانية حتى لرئيسة البلاد.
وقررت رئيسة تنزانية سامية صلوحي رئيسة تنزانية تخصص مكافأة لفريق سيمبا على كل هدف غيماريه فمرمى الرجاء الرياضي، فالماتش اللي غيجمع الفريقين السبت الجاي، وحسب المسؤول الإعلامي ديال سيمبا أحمد علي، فرئيسة تنزانيا الملقبة "ماما سامية"، خصصت مبلغ 5 مليون شلن العملة المحلية على كل هدف غيماركيوه سيميا فمرمى أنس الزنيتي لكول ديال الخضرا.
وكثر من هادشي فإدارة سيمبا حسب المسؤول الإعلامي للنادي، معولة تعمر التيران ديال الماتش بالجماهير التنزانية ويكون حضورها كبير ضد الرجاء، باش تشكل دفعة معنوية لفريقها وتضغط على الفريق الأخضر، ونقصت من ثمن تذاكر المباراة غيبداو يبيعو فيهم إبتداء من غدا الأربعاء.
ومقابل هادشي اللي كيوجد فيه فريق سيميا، فالرجاء الرياضي غيشد الطريق غدا الأربعاء من المغرب إلى تنزانيا فرحلة شاقة حيث رئيس النادي عجز على توفير طائرة خاصة تسافر بالفريق فرحلة مباشرة، والخضرا غتمشي حتى لقطر عاد تشد الطريقة إلى تنزانيا ونفس الشي غادي تديرو فالاياب ملي تبغي ترجع للمغرب.