ليفار نفاردو بصدارة البطولة مؤقتا من بعدما ربحو الماص اللي تعرضو لاعتداء على كارهم فطريق التيران

حقق فريق الجيش الملكي فوز مهم على فريق المغرب الفاسي قبل لحظات من اليوم الأربعاء فتيران قنيطرة، ضمن الجولة 13 من منافسات البطولة الإحترافية لكرة القدم.
وحسمو ليفار الماتش بنتيجة 2 لواحد، وماركاو الهدف الأول عن طريق ديني بوكريس فالدقيقة 25 من بيلانتي، ورجع الجيش الملكي وعزز النتجية بهدف ثاني فالدقيقة 62 من بيلانتي آخر وهاد المرة بواسطة رضا سليم، أما المغرب الفاسي فقلص النتيجة بواسطة كريم الهاشيمي فالدقيقة 71 بهدف، وحاول من بعدها الماص تعديل الحصة ولكن ما قدروش اللاعبين ديالو وسالا اللقاء بفوز ليفار.
وبهاد الرباح انفرد فريق الجيش الملكي بصدارة البطولة الإحترافية وابتعد بفارق 3 نقاط على الأقل عن أقرب المنافسين، ورفع رصيدو إلى 28 نقطة فانتظار يكملو ليماتش ديال الجولة 13، أما المغرب الفاسي اللي جا يلعب الماتش ديال اليوم فالطونوبيلات حيث تم الاعتداء على كار الفريق فالطريق إلى التيران، فتجمد الرصيد ديالو عند 20 نقطة، وكيحتل المركز السادس فالترتيب.