وضع عزيز البدراوي الرئيس ديال فريق الرجاء الرياضي حد لشعار "لا لازدواجية المهام"، اللي كانت كترفعو الجماهير الرجاوية منذ سنوات، وكاتطالب هي والمسؤولين السابقين فالفريق بتحقيقو فالعصبة الوطنية لكرة القدم. عزيز البدراوي تم التعيين ديالو نائبا لرئيس العصبة الإحترافية لكرة القدم الوطنية، وهاذ التعيين كانوا كايشوفوه الرجاويين أنه فيه ازدواجية ديال المهام فالمرحلة ديال الرئيس الودادي سعيد الناصيري، اللي كان فالولاية الماضية كايترأس العصبة وفنفس الوقت كايشرف على تسيير الوداد الرياضي، وهو الأمر اللي كانوا كيشوفوه الرجاويين فيه تضارب ديال المصالح وأنه فيه تأثير على التنافس بين الفرق ولو أن الناصيري ما تكون عندو حتى نية لذلك. جماهير الرجاء كانت تطالب برحيل سعيد الناصيري على العصبة وحتى المسؤولين اللي مروا فالرجاء فحال جواد الزيات ورشيد الأندلسي وانيس محفوظ كان عندهم نفس المبدأ والخطاب، وكان الرجاء فالعهد ديال الرئيس الأسبق الزيات صوت ضد سعيد الناصيري لتولي رئاسة العصبة الإحترافية لكرة القدم لولاية ثانية فالجمع ديالها الانتخابي، والرئيس السابق أنيس محفوظ حتى هو أكد أنه ضد ازدواجية المهام، وأن العصبة خاصها الاستقلالية والحياد، قبل ما يجلس البدراوي على كرسي رئاسة الرجاء ويقلب جميع المعطيات. البدراوي الرئيس الجديد ديال الرجاء الرياضي بالدخول ديالو المكتب المديري ديال العصبة الإحترافية لكرة القدم الوطنية وبتوليه منصب نائب الرئيس ديالها، كايكون دار قطيعة مع المطالب ديال الرجاويين فالامس القريب، أي قبل ما يقدم الناصيري الاستقالة من العصبة، وكايطوي صفحة من صفحات مطالب رجاوية كان كيشوفها جمهور الفريق الأخضر أنه لا مفر من تطبيقها، لتحقيق العدالة داخل كرة القدم المغربية وضمان التنافس الشريف، ولكن البدراوي فأول الأشهر ديال رئاستو للرجاء قدر يدخل للعصبة الإحترافية، حيث عندو نظرة مختلفة "لازدواجية المهام"، وكايشوف أن الفريق خاصوا يكون داخل فالمؤسسات الكروية ديال المغرب ماشي يبقى يرفع الشعارات برا المؤسسات. للإشارة فالرجاء والوداد غايكونوا ممثلين فالمكتب الجديد ديال العصبة الإحترافية لكرة القدم الوطنية، اللي كيترأسو عبد السلام بلقشور، الرجاوي عزيز البدراوي نائب أول ديال الرئيس الودادي سعد الدريب كنائب ثاني ديال الرئيس.
