ربح المنتخب الوطني المغربي لأقل من 18 عام الميدالية البرونزية فكرة القدم فإطار ألعاب البحر الأبيض المتوسط (وهران 2022)، بعد الانتصار ديالو فماتش تحديد المركز الثالث فالبطولة اللي لعبو هاد العشية ضد المنتخب التركي ب4 ل2. وكان منتخب تركيا هو اللي سبق وسجل فالميطا اللولة قبل ما يماركي اللعاب المغربي أنهاري التعادل لفريقنا الوطني اللي لعب ميطا زوينة. ومع بداية الميطا الثانية زاد المهاجم ريحاني البيت الثاني لأشبال الأطلس بطريقة واعرة بزاف، ومن بعدها بسباب خطأ فالدفاع ديالنا قدرات تركيا ترجع فالماتش وماركات التعادل. ولكن الوليدات ماهبطوش يديهم، خصوصا وأنهم كانو لاعبين ماتش واعر، وقدرو يزيدو فرضو الريتم ديالهم ويجيبو انتصار مستحق بعدما زادو هدف ثالث من مورير اللي حط الكرة فالشبكة من بعد تمريرة من الأنطاكي، وقبل ما يسالي الماتش غيأمن عمر صادق السكور لصالح أشبال الأطلس بالبيت الرابع.
