"لابيجي" فبني نصار طيحات ريزو متخصص فشفرة المازوط ديال الترانات

تمكنات عناصر فرقة "لابيجي" ديال مفوضية الأمن فبني نصار، إقليم الناظور، نهار الخميس الفايت، من تفكيك شبكة إجرامية مختصة فشفرة المازوط ديال الترانات اللي تابعة للمكتب الوطني للسكك الحديدية.
هاد الريزو حسب مصادر ل"كَود"، أكدات أنه كيتكون من 6 أشخاص كتراوح الأعمار ديالهم ما بين 29و 56 سنة، بحيث أن الزعيم ديالهوم كان مبحوث عليه وطنيا، وسبق دوز 10 سنين نافذة، بتهمة محاولة قتل مهاجر تونسي.
وحسب المصادر نفسها، تفكيك عناصر هاد الشبكة، جا بعدما تحصلات عناصر الشرطة القضائية، على معلومات دقيقة، الشي اللي خلاها دير خطة أمنية محكمة طيحات المجرمين بسرعة.
جميع الموقوفين تم وضعهم رهن تدبير الحراسة النظرية لفائدة البحث اللي كيدار تحت إشراف النيابة العامة المختصة، في انتظار يتقدمو للعدالة باش تقول كلمتها من أجل المنسوب إليهم.