الجزائر بدات بالفايك بعد ما كلات طرحة دالعصا فالديبلوماسية. طلقات اشاعة "الاقامة الجبرية" للهمة واخا يالله كان فاجتماع رسمي هادي ايام

بعد الطرحة دالعصا اللي كلاتها الجزائر ومعاها البوليساريو فقضية اعتراف اسبانيا بطريقة ما بمغربية الصحرا فرسالة رسلها رئيس حكومة الصبليون بيدرو سانشيت للملك الجمعة اللي فاتت٬ تلفات دولة الكابرانات. داخت. بغات ترد على المغرب بالفايك وضربو فالسياسة الداخلية.
مشات طلقات اشاعة وكذوب فيها ان فؤاد عالي الهمة مستشار الملك فالاقامة الجبرية وباللي ممنوع يخرج او يتحرك.
كذبة كبيرة ومستشار الملك هادي ايام كان حاضر فجلسة عمل حول الميثاق الجديد للاستثمار ترأسو الملك محمد السادس. كان هاد الشي نهار 16 فبراير اللي فات.
اللي طلق لخبار شي وحدين مع الجزائر ومحكمها فيها المخابرات الجزائرية وكتمولها وتابعة للبوليساريو ومن بعد تبعوها قنوات اخرى تابعة للمخابرات العسكرية الجزائرية.
الزلزال اللي دارو الموقف الصبليوني خلاهم يتصطاو. الكابرانات صدمهم القرار بزاف وما كانش فراسهم. بقى قدامهم غير الفايك بطريقة غبية بحال اللي طلقوه على مستشار الملك.