"لاراثون": الجزائر وجدات صواريخ فاتجاه المغرب.. والرباط: ما باغين حرب ولكن موجدين باش نردو على اي اعتداء – تصاور

نشرت يومية "لاراثون" الاسبانية صورا قالت باللي ديال استعدادات الجزائر للحرب مع المغرب. اليومية نشرات صور موجودة من شي ساتيليت فيها ما اعتقدت انها منصات اطلاق صواريخ حطاتها وزارة الدفاع الجزائرية قرب الحدود المغربية وطبعا موجهة لبلادنا.
كما نشرت صورة اخرى فيها شي 7 من هاد المنصات.
الجزائر من نهار توفاو 3 مواطنين فمنطقة عسكرية تحت مراقبة الامم المتحدة وهي كتاهم المغرب. دابا المينورسو انتاقلو البارح باش يديرو تحقيق ديالهم واكيد غاديين يخرجو نتائج هاد التحقيق.
قبل ما يخرجو النتائج كانت الرئاسة الجزائرية اتهمات الرباط بهاد العدوان اللي سماتو "جبان" ووعدات برد. المغرب البارح خرج عن طريق مسؤول ما كشفش على اسمو باللي هاد الاتهامات الجزائرية خاوية وباللي الرباط ما عمرها تعدات على الجزائر وباللي ما باغياش تدخل فشي حرب ضد الجارة الشرقية.
لكن مقال "لاراثون" فيه ان القوات المسلحة الملكية غادية ترد على اي اعتداء ضد المملكة.