قريبا.. أي فيديو "يوتوب" بديتيه من تلفونك تقدر تكملو ف الپي سي

"يوتوب" غادي يطرح ميزة جديدة يقدر من خلالها المتفرج يكمل الفيديو اللي يقدر يكون بداه من السمارتفون، (يكملو) من بعد ف الپي سي ديالو.
هاد الميزة جديدة غادي تخلي لك الفيديو اللي فايت بديتيه ف البورطابل طالع في الشاشة ديال الپي سي على شكل مينياتور (ف الفيرسيون ويب ديال يوتوب)، حتى الواحد يكون مسالي ويكمل الفراجة، بواسطة الخاصية ديال "كمل الفراجة" (Continue watching) اللي كتبان مكتوبة تحت الفيديو المعني.
هاد القضية غادي تكون في تلفونات "أندرويد" و"أيفون" وهاكا الواحد يكمل ف الپي سي ديالو أي مقطع فيديو يكون بداه قبل من تلفونو وما تضيعش ليك الدينامية ديال الفراجة وانت كتبدل من جهاز لجهاز.