هذ الحملة عرات على تخونيج الأحزاب الاشتراكية. بمنطق المرا حشومة وعورة.. اللائحة النسائية لمرشحي جماعة الفنيدق من الاتحاد الاشتراكي نصها داير الفولار والنص لاخر ماحاطينش تصويرتهم كَاع

من بعد تبهديلة اللائحة النسائية للاشتراكي الموحد فخريبكَة، اللي كلها محجبات وعيالات ماحاطينش تصاورهم، الاتحاد الاشتراكي حتى هو مشا على نفس الخطى، وحط لائحة شوهة فجماعة الفنيدق.
لائحة الاتحاد الاشتراكي النسائية فالفنيدق فيها 4 صور فقط لنساء دايرين الدرة، بينما المرشحات ال6 الأخريات حتى وحدة فيهم ما حاطين تصاورهم، بمنطق "المرا عورة" و"حشومة تبان".
ولو كان هذ الحزب إسلامي نتفهمو هذ الإهانة تدار فحق المرشحات، بعتبارهن "عورة" و"سلعة جنسية" و"حلوى مكشوفة"، لكن الغريب هو أن هذ الأحزاب اشتراكية وكتدافع على مبادئ اليسار والمساواة بين الجنسين، الشي اللي ماكتجرمهاش هذ اللوائح، وكتبين أن هذ الأحزاب فالعمق خوانجية فأفكارها ومخبية تحت غطاء الحداثة والتقدم اللي ماكطبقوش فالواقع.ب