واش غاتوقف حركة الطيران بين المغرب والجزائر بعد قطع العلاقات؟

بعدما اعلن رمطان لعمامرة وزير خارجية الجزائر، عن قطع العلاقات الدبلوماسية مع المغرب، كان السؤال الاهم في عقول المغاربة في الجزائريين والجزائريين في المغرب، هو واش غاتوقف حركة الطيران بين البلدين.
طبعا البعثات الدبلوماسية فكلا البلدين غادي توقف، وغاتسد السفارات والقنصليات، وهذا كايعني اوتوماتيكيا أن أي مواطن مغربي غايمشي للجزائر ومشى تلفلو الباسبور غايبقى حاصل تماك الى يوم ترجع العلاقات بين البلدين، ونفس الامر ينطبق على الجزائريين فالمغرب.
ولكن لعمامرة ماعلنش على اغلاق الحدود الجوية بين البلدين، لانه مايمكنش يعلن على وضع التأشيرة حقاش هذا امر مستحيل حقاش منين غاياخذ المسافر التأشيرة، اللهم اذا دارو تأشيرة المطار وهذا امر مستبعد، حقاش يلا كانو كيفكرو فهاد الاتجاه فغيعطيو مهلة للمغاربة والجزائريين باش كل واحد يرجع لبلادو وغايسدو حركة الطيران.
طبعا الجزائر مستبعد دير هاد الخطوة، حقاش العمال والحرفيين فالجزائر غالبيتهم مغاربة، سواء نجارة او كباصة او في اي مهمة يدوية، وفحال اغلاق الحدود او طرد المغاربة غاتوقع ازمة حقيقية فالعمالة عند الجيران، بينما حنا فالمغرب ماعندناش هاد المشكل.