الاصابات كيتزادو نهار على نهار وبنادم مامسوقش.. لليوم الثالث كنسجلو كثر من 1000 إصابة بكورونا ف24 ساعة

لليوم الثالث على التوالي كنفوتو 1000 إصابة بكورونا، وهذا كيعني أن الوضعية الوبائية فبلادنا غادة وكتسوء، فالوقت اللي بنادم مابقاش ملتزم بزاف بالكمامة وإجراءات التباعد.
اليوم الخميس 8 يوليوز، وغير فهذ 24 ساعة الأخيرة تقاسو 1336 بالفيروس، وماتو 5، وفالمجموع 6866 كيتعالجو، وكثر من 51 ألف خداو الجرعة الأولى.
التلقيح:
وتلقحو اليوم 51137 بالجرعة الأولى، ووصلو فالمجموع ل10317807، وتلقحو بالجرعة الثانية 8782، ووصلو فالمجموع ل9213535.
الإصابات:
تقاسو اليوم 1336 واحد من أصل 18422 واحد دار التحليلة، ووصل عدد المصابين فالمجموع ل538589.
ومؤشر الإصابة التراكمي وصل ل1480 لكل 100 ألف نسمة، بمعدل 3,6 لكل 100 ألف نسمة فهذ 24 ساعة.
حالات الشفاء:
تشافاو اليوم 706، ووصل الإجمالي ل522377، بنسبة تعافي ديال 97 فالمية.
الوفيات:
واليوم ماتو 5، واحد فكل من كازا والصخيرات وأكَادير وإنزكَان والناظور، ووصل هكذا عدد الوفيات ل9346، بنسبة فتك 1,7 فالمية.
الحالات النشيطة والحرجة:
عدد الحالات النشيطة طلع ل6866، وعدد الحالات الحرجة وصل ل282، 33 تدهورات غير اليوم، و12 تحت التنفس الصناعي الاختراقي.