فيلم "Night Walk" ديال المخرج المغربي عزيز التازي محيح عالميا.. مثل فيه الممثل الكبير ميكي رورك وتصور بين المغرب ولوس انجليس

حقق فيلم Night Walk للمخرج والمنتج المغربي عزيز التازي نجاح كبير على المستوى الدولي، بحيث قدر يتباع باش يتوزع عالميا.
وهذا الفيلم المغربي الأول اللي كيتوزع فهوليود، وتباع فمجموعة من الاسواق العالمية بشكل كبير حتى قبل ما يخرج فميريكان هذ الشهر، فروسيا، وبريطانيا، والدول الاسكندنافية، والمانياد وامريكا اللاتينية، وفالهند، وقريب يتوزع فالشرق الاوسط وآسيا وأوروبا الشرقية.
وفميريكان غيكون الفيلم متاح بتقنية VOD ابتداء من 15 يونيو عن طريق شركتي Lionsgate وGrindstone Entertainment Group.
والفيلم تصور فالمغرب ولوس أنجلوس، وتناول قضايا الفساد والسياسة، وهو من بطولة شون ستون، اللي مثل دور أمريكي مسجون فدولة عربية من بعد اتهامو بقتل صديقتو العربية، وفالحبس غيتصاحب مع واحد غيعاونو ويساندو، وأدى هذ الدور الممثل الكبير ميكي رورك.
ومثلو فيه كذلك سارة ألمي، وإريك روبرتس، وباتريك كيلباتريك، ومغني الراب الفرنسي لافوين، وعاد ممثلين مغاربة بحال أحلام الزعيمي وعبد الله شيشة.
من خلال الفيلم، التازي بغى يبدل الصورة النمطية اللي كاينة ف هوليوود على العرب.
https://variety.com/2021/film/news/moroccan-thriller-night-walk-mickey-rourke-1234981973/