ولادة استثنائية.. مرا مالية ولدات 9 ديال التوام فكازا

علنات وزارة الصحة المالية اليوم الثلاثاء أن حليمة سيز، لي جات للمغرب في مارس لي فات، ولدات 9 ديال التوام في كلينيك في كازا.
السيدة عندها 25 عام، ودارت الايكوگرافي شحال هادي وكان مقرر تولد 7، ولكن وزارة الصحة المالية وضحات أنها فالاخير ولدات 9 هاد العشية.
الأم جات من مالي بعدما دوزات 2 سيمانات في سبيطار في العاصمة باماكو، وكان معاها الطبيب ديالها وعائلتها، واختارو المغرب باش الأمور دوز بيخير وعلى خير، حيت كان خاصها رعاية خاصة.
وزيرة الصحة المالية فانتا سيفي شكرات الأطباء المغاربة لي ساهمو في نجاح العملية الاستثنائية.