البوليس والمخازنية جراو على الافارقة من محطة ولاد زيان

جراو السلطات المحلية والأمنية، اليوم السبت، فحملة تمشيطية غير مسبوقة، على الافارقة جنوب الصحراء اللي كاينين بالقرب من محطة ولاد زيان فكازا.
وهذ الحملة جات بعد شكاية قدموها الجيران، واللي قالو فيها انهم كيديرو الصداع بالليل، وكاتنوض المضاربات بيناتهم، وكاين من الساكنة اللي قدم شكاية بالاعتداء عليه من طرف بعضهم، الشيء اللي خلا السلطات الأمنية تتخذ هذ القرار.
ودابا غيتم إبعاد هذ الناس من قدام المحطة، وهي البلاصة اللي حولوها لملجأ ليهم ونصبو فيها الخيام، خصوصا بعدما تسدات المحطة بسبب فيروس كورونا المستجد، كيف غيمنعوهم السلطات من أنهم يعاودو يتجمعو فهذ البلاصة من جديد.