آيت الطالب عين مدير جديد لسبيطار المامونية فمراكش

عين خالد آيت الطالب، وزير الصحة، الدكتور كريم الزوهري، باش يتولى منصب مدير مستشفى ابن زهر فمراكش (المامونية).
الزوهري، اللي باقي لحد الساعة كيتولى منصب مدير المركز الاستشفائي سيدي محمد بن عبد الله فالصويرة، خدا هذ المنصب من بعد ما قدم محمد المحمدي استقالتو، بعد أيام قليلة من التعيين ديالو كمدير مؤقت للسبيطار.
وغير هذي أيام، مشا وزير الصحة يتفقد الوضعية الصحية فسبيطارات مراكش، بعدما خرجو تصاور لمجموعة من المرضى فسبيطار المامونية ناعسين فالأرض ومزاحمين فالكولوارات، وأوديوات ديال طبيبات كيتكلمو على الاكتظاظ اللي عندهم فقسم المستعجلات وقلة الأطقم الطبية والتمريضية والمعدات الطبية فأقسام الإنعاش.
وعقد آيت الطالب اجتماع مع والي الجهة والمديرية الجهوية للصحة، اتخذ من خلالو مجموعة من القرارات أهمها إخلاء مستشفى المامونية من مرضى "كوفيد 19′′، والاقتصار فيه فقط على إجراء التحاليل للكشف على الفيروس.