دوز عقوبتو.. الصحافي الطاوجني خرج من الحبس – فيديو

اليوم الأربعاء، خرج الحقوقي والصحافي محمد رضا الطاوجني من الحبس المحلي دآيت ملول، بعدما دوز العقوبة الحبسية ديالو اللي تحددات فشهراين.
ونشر الطاوجني هذ الصباح، فالحساب ديالو الرسمي على موقع التواصل الاجتماعي فيسبوك، فيديو كيشكر فيها كَاع اللي تضامنو معاه، وكيعتبر هذشي اللي دوز ماشي محنة، بقدر ما هي تجربة فريدة فضحات المسؤولين فجهة سوس ماسة، على حد تعبيرو.
https://www.facebook.com/story.php?story_fbid=10223376289224767&id=1512608269
وكانت محكمة الاستئناف أيدات الحكم الابتدائي اللي صدر فحق الطاوجني، وحكمات عليه بالحبس شهراين وبغرامة 5000 درهم.
وكانت النيابة العامة فعاصمة سوس تابعات الطاوجني بتهم "وضع صفائح مزورة على مركبة، وانعدام التأمين، وحيازة بضاعة خاضعة لرسوم غير مبررة، وحيازة رخصة سياقة غير مناسبة للطوموبيل اللي كيسوكَ".
وتم توقيف الطاوجني ف26 يونيو الماضي، وتوضع رهن الاعتقال الاحتياطي.
وقبل من هذشي، تمت متابعة الطاوجني فحالة سراح بتهمة "انتحال صفة مهنية ينظمها القانون وخرق حالة الطوارئ الصحية"، بعدما كان سافر من أكَادير لمنطقة تامري بدون رخصة ديال التنقل، من أجل تصوير روبورتاج على ندرة المياه فسد مولاي عبد الله فالمنطقة.
وكانت توضعات ضد الطاوجني شكايات أخرى من طرف مسؤولين بارزين فجهة سوس ماسة.