فضيحة هادي. شكون دخل كورونا فيروس لاسفي. شكون دخل هاد الحالة ومع من تواطأت وها اش قالت لينا المديرة الجهوية للصحة بالجهة

كشفات لمياء شكيري، المديرة الجهوية للصحة فجهة مراكش آسفي، على تسجيل أول إصابة بفيروس كورونا المستجد بمدينة آسفي، هذ العشية من مورا الستة.
وقالت شكيري، فتصريحها ل"كود" بللي السيدة معنية فصحة جيدة، وتقاست بالفيروس من بعد ما مشات مع الأم ديالها اللي مريضة بالسرطان لمدينة مراكش باش تدير الطريطمون ديالها، ومن المرجح تكون تعادات بالفيروس من تماك.
وقالت باللي المديرية الجهوية لجهة مراكش آسفي مذكراتش الإصابة الأولى بالفيروس لهذ السيدة فآسفي، فالآنفوكَرافيك اللي كيعطي تفاصيل مفصلة على الإصابات الأقاليم، حيت تسجلات من بعد الستة دالعشية، يعني من بعد ندوة مدير الأوبئة، والحصيلة كتتوقف فهذ الوقت، وغيتم تعديلها غدا مع العشرة.
مصادر أخرى كشفات ل"كود" أن الأم ديال هذ السيدة حتى هي جرات التحاليل، وكاين احتمال حتى هي تكون مصابة بالفيروس، وفالغالب النتائج ديالها غيخرجو هذ الليلة أو غدا.
نفس المصادر كتقول بللي تم وضع السيدة اللي تصابت بالفيروس فالمركز الاستشفائي محمد الخامس بآسفي، وتم عزلها فشومبر بوحدها.