ها كيفاش حصل واحد كيقول للبوليس أنا صحافي: داير شارة معلقها ف الطونوبيل والنيابة العامة دارتو ف الحراسة النظرية

حصلت "كود" على معطيات جديدة حول الصحفي "المزيّف" اللي قرقبو عليه البوليس البارح الجمعة خلال فترة حالة الطوارئ الصحية. الموقوف هو الآن تحت الحراسة النظرية وغادي يتقدم بطبيعة الحال للنيابة العامة المختصة.
وقالت مصادر "كود"، أن هاد الصحفي المزيّف حصلوه البوليس كيصور من الطونوبيل ديالو أجواء حالة الطوارئ الصحية، ومني وقفوه وسولوه قاليهوم أمام صحافي. السيد لقاوه معلّق "شارة" صحفي ف الطونوبيل ديالو وخا معندو علاقة بالمهنة لا من قريب ولا من بعيد.
دبا البوليس ديال الدائرة السادسة "الدكارت" بفاس سمعو ليه ف محاضر قانونية، وغادي يقدموه للنيابة العامة اللي غادي تاخد معاه الإجراءات القانونية اللاّزمة.