وبزاف. بقى لينا غير بيبو. مخونج فكوستيم وكيدعو للقتل وهاد الشي خارج مع السلطات باش يدير التعبية: اقتلو من لا غيرة له

كل نهار كنكتاشفو فيلم جديد. لشي متخلف كيدور مع ناس السلطة فالمحمدية اسمو بيبو كينشط حفلات الاطفال ولى واعظ. جابوه باش يقنع لمغاربة يبقاو فدارهم.
قبل ما نهدرو على خطابو المتطرف نشوفو كيفاش جا. لابس لبسة بحال ايلى غادي للعرس وراكب فالرانج. اييه الرانج. منها بدا كلامو وحتى هو عندو مصور بحال القايدة حورية وباقي قياد المغرب. نزل من الطونوبيلة وكمل كلامو الخطير بالبوق.
نجيو للمضمون. هاد بنادم هدر على حالة حي النصر فالمحمدية وبقى جيب يا فم وگول. تبع ولد وكيقول ليه "انت خائن". اش هاد الوقاحة. اش هاد الضصارة. شكون هاد بيبو حتى يوزع الوطنية.
بعد هاد الشي قال وراه محاط بالمخزن "اقتلوا من لا غيرة له" ..اللي ما عندوش غيرة على بلادو ولا على وطنو ولا على امو ولا على باه "موتتو حسن من حياتو". ثم اضاف "ماشي مغربي".
يا ناس السلطة فالمحمدية اش هاد التخونيج اش هاد التطرف اش هاد الخطاب المتخلف. علاش تسمعو بهاد الشي.
سالى خطابو الارهابي ودار شي كليمات ودار التحية على النشيد الوطني.
شكون سمح بهاد التطرف؟