حاتم عمور غاير من لمجرد: سعد ماشي بريء.. وماشي فمصلحتو يغني وهو وسط قضايا الاغتصاب -فيديو

في عز الخلعة لي شادة المغني سعد لمجرد بعدما المحكمة ففرنسا غيرات التهمة الموجهة ليه من تعنيف جنسي لاغتصاب، خرجات تصريحات ديال المغني حاتم عمور كيقول فيها أن لمجرد ماشي بريء، وأنه ماشي من مصلاحتو يغني ويدير الحفلات وهو وسط المشكل.
وبان حاتم عمور كيدوي ومعصب وحالتو حالة وقال أنه بدا الغنا بهاد الستيل الموسيقي قبل من لمجرد ومكيبغيش لي يقارنو بيه، وهاد الفيديو تم تداولو بقوة بين الصفحات الكبيرة لي متخصصة في أخبار المشاهير في المغرب.
بحث بسيط درناه، لقينا أن الحوار لي دارو عمور مع إذاعة تونسية قديم وداز هادي عامين، تحديدا في 30 دجنبر 2018، وكانو ديك الوقت قالبينها صباط.
عمور معجبوش الحال أن الفيديو قديم يرجع يتداول بزاف، ودار بوسط البارح الأحد فليل في انستكَرام كتب فيه “حسبنا الله ونعم الوكيل”.